ماتش الزباين

أكيد طبعا انا مبقتش بشجع كورة لدرجة اني اكتب عنها. الموضوع و ما فيه اني افتكرت التعبير دا وانا قاعد دلقوتي.

و التعبير دا انا واخده من واحد صاحبي اسمه احمد منير (لا يمت باي صلة للفنان محمد منير وانا سالته بنفسي). احمد بيقولي تعبير “ماتش الزباين” دة كل ما اغلبه في البي اس و دا مبيحصلش كتير. هو في رأيه انه مينفعش يفضل كل مرة يغلبني لان لو الموضوع فضل كدا “الزبون” (الي هو انا) هيتطفش و مش هيلاقي حد يغلبه فلازم يسيبني اكسب كدا كل فترة. حاجة كدا زي لما الاهلاوية يقلولك مينفعش نكسب الزمالك كل مرة لازم كل شوية نسبلهم ماتش.

ألمهم انا افتكرت موضوع ماتش الزباين دا النهاردة وانا بفكر في الي حصل في انتخبات مجلس الشعب 2010. وانا بفكر قلت طيب طالما الحكومة كدا كدا بتزور و ببجاحة طيب لية سايبين شوية مقاعد فالمجلس للمستقلين والمعارضة؟  لية  ميبقاش المجلس كلو حزب وطني بدل ما يبقي معظمو حزب وطني؟ و هنا جه فدماغي ماتش الزباين. ماهما لو كل مرة هيكسبو في كل الدواير الزبون هيطير و مش هيلاقوا حد بعد كدا يلعب معاهم (قصدي يمثل) و ساعتها ولاد الدايرة (الي هما الشعب) هيبقي معاهم حق في موضوع “المراقبة الدولية”.

بس الي حرق دمي بجد ان اول ما بصيت في جرنال الاهرام النهاردة لقيت خبر فالصفحة الاولي “اشادة اوروبية بنزاهة و نجاح انتخبات مجلس الشعب” رحت علي طول جريت علي الابتوب و فاتح البي بي سي علي قسم الشرق الاوسط لقيت اخبار عن التزوير الي حاصل فالانتخبات في مصر. اله؟ طيب اصدق مين فيهم؟ انا قلت ادي الاهرام فرصتو يمكن الي كتب الماشيت ملحقش يكملو و كان قصده اشادة اوروبية بنزاهة و نجاح انتخبات مجلس الشعب في كزاخستان مثلا. نزلت عالخبر الي بعدو الي بيقول ان في مشاركة بنسبة 25%؟؟؟!!!! 25% من مين بالظبط؟؟؟؟ الشعب ولا المسجلين للانتخاب؟؟

لو قصدو الشعب فالمفروض اننا بسم الله ما شاء الله و حصوة في عين الي ما يصلي عالنبي عدينا ال80 ميلونز يعني قول 40 مليون ليهم حق الانتخاب يبقي المفروض 10 مليون انتخبوا. 10 مليون في يوم واحد. يعني ال25% دي معناها ان المفروض انا واحد من كل 4 اعرفهمراحو انتخبو و هو اصلا مافيش غير واحد اعرفه الي راح انتخب.

اما اّذا كان قصده 25% من المسجلين فدي نسبة مضللة. يعني لو 1% من الشعب هما الي مسجلين و 0.5 % من الشعب انتخب هتبقي المشاركة 50%؟ ما علينا

الي انا بقي بجد مستغربه ان الناس مستغربة. لية؟ يعني هو احنا كنا مستنيين حاجة تانية؟ هو دا علي اساس ان انتخبات مجلس الشوري محصلش فيها كدا؟

يلا فالنهاية احب اقول عاشت مصر حرة مستقلة و تحيا الوحدة العربية و يحيا الاتحاد الشتراكي و يحيا الدعي العما الاشتراكي و انا و انت وابقي سلملي علي نزيهة عشان شريفة خلا اتجوزت و قعدت في بيتهم.

سلام انا بقي ادخل انام عشان عندي معتقل الصبح بدري ااااااا قصدي مزاكرة

Advertisement